Word 2007

Sí eisini Windows-knappaborðsuppsetingar.

Ein vanlig orsøk til at Stavarin ikki riggar, er at knappaborðið ikki er rætt uppsett, hóast føroysku stavirnir verða rætt vístir á skíggjanum. Undir Føroyskt knappaborð er greitt gjøllari frá hesum.

Málkotur í Word

Í Word ber til at nýta fleiri ymisk mál í einum skjali. Í skjalinum verða málkotur goymdar, sum siga hvørjum máli, teksturin er á, og Word finnur so út av at nýta tann rætta rættstavaran til teir ymisku partarnar av skjalinum. Tað ber eisini til at velja, at rættstavarin skal loypa partar av skjalinum um í rættlestrinum.

Málið hjá tekstinum, sum vísin stendur á, verður víst niðast í vindeyganum.

Fyri at føroyski rættstavarin skal nýtast, má føroyski teksturin sostatt verða merktur við málkotuni fyri føroyskt. Í Word verða málkotur settar á henda hátt:

Tá ið tú ikki beinleiðis hevur valt eitt mál, er málið tað sama sum málið hjá sniðinum (Normal, Overskrift 1, Overskrift 2 o.s.fr.), sum teksturin er skrivaður við.
Tú kanst skifta mál við Angiv sprog. Tað tú síðan skrivar verður á tí valda málinum.
Tá ið tú hevur flutt vísan (markør/cursor) og byrjar at skriva, verður skift til málið hjá tekstinum, sum stendur frammanfyri vísan.
Tá ið fleiri Windows-knappaborðsuppsetingar verða nýttar, verður nýggjur tekstur á málinum hjá tí valdu knappaborðsuppsetingini. Hetta hevur gildi, til tú skiftir mál við Angiv sprog..., flytir vísan ella velur eina aðra knappaborðsuppseting.

Word 2007 hevur eisini ein hentleika Find sprog automatiskt, sum kannar tekstin so hvørt, hann verður skrivaður, og roynir at finna útav, hvørjum máli teksturin er á. Hesin hentleikin má sláast frá, tí annars verður føroyskur tekstur í summum førum hildin at vera á onkrum øðrum máli enn føroyskum og orðini verða merkt at vera skeivt stavaði. Undir Angiv sprog... er greitt frá, hvussu hetta verður gjørt.

Tá ið bert ein knappaborðsuppseting verður nýtt, er sostatt neyðugt at broyta mál hjá sniðunum í teimum skápilónum, sum verða nýttar, tí hevur tú t.d. eina danska útgávu av Word, er málið hjá Normal-sniðinum sett til danskt í øllum innløgdum skápilónum.

Tú kanst broyta málkotuna hjá eini skápilón við gera eitt nýtt skjal, sum byggir á skápilónina. Vel síðan Angiv sprog... og set standardmál til føroyskt. Tá verður føroyskt málið fyri sniðið sum eitur Normal í tí skápilónini, sum opnaða skjalið byggir á. Hetta er í flestu førum nóg mikið, tí vanliga hevur einans Normal-sniðið eina málkotu.

Hevur tú eina skápilón, har fleiri snið hava fingið málkotur, er neyðugt at rætta tey ymisku sniðini við Formater, Typografi.

Angiv sprog...

Vel spjaldrið Gennemse

Klikk á Angiv sprog...

Hetta vísir ein lista yvir tey mál, ið kunnu veljast. Málini sum rættstavarar finnast til, verða víst við eini lítlari mynd vinstrumegin.

Verður klikt á OK, og ein blokkur av teksti er markaður, fær blokkurin málkotuna hjá tí valda málinum. Er eingin blokkur markaður, verður skift til málið, og tað sum síðan verður skrivað, fær málkotuna hjá tí valda málinum. Setur tú kross við Kontroller ikke stavning eller grammatik og velur OK, verður tann markaði blokkurin ella tað, sum síðan verður skrivað, ikki rættlisið.

Tá ið Find sprog automatiskt er sligið til, roynir Word, so hvørt sum nakað verður skrivað, at finna út av, hvørjum máli tað er á. Find sprog automatiskt má vera sligið frá, um føroyski rættstavarin skal virka, sum hann eigur.

Standard... Broytir málkotuna fyri Normal-sniðið í tí skápilónini, sum skjalið byggir á. Tá ið tú bert arbeiðir við einari Windows-knappaborðsuppseting, skalt tú velja føroyskt sum standardmál í teimum skápilónum, tú arbeiðir við. Hetta ger, at føroyskt av sær sjálvum verður málið í teimum nýggju skjølunum, sum verða gjørd út frá hesum skápilónunum.

Flyt til málið, ið skal veljast sum standardmál, klikk á Standard og klikk síðan á Ja, tá ið spurningurin niðanfyri verður vístur.

Rættlestur

Undir spjaldrinum Gennemse er uttast vinstrumegin ein knøttur við tekstinum Stave- og grammatikkontrol.

Klikk á henda knappin og rættlesturin fer í gongd.

Tá ið komið verður til eitt orð, sum rættstavarin ikki kennir, kemur eitt vindeyga fram.

Ikke i ordbog vísir setningin við tí skeivt stavaða orðinum, sum verður skrivað við reyðum. Tú kanst fara inn í henda teigin at gera rættingar.

Forslag er ein listi við uppskotum, sum kunnu setast inn fyri orðið. Tú kanst seta eitt uppskot inn við at dupulklikkja á tað við músini ella við at flyta í listanum og síðan velja Erstat, Erstat alle ella Autokorrektur. Undir Stillingum ber til at velja, um rættstavarin skal koma við uppskotum, so um hesin listin altíð er tómur, er tað tí at hesin møguleikin er sligin frá.

Sprog vísir, hvørjum máli skeivt stavaða orðið er á. Um orðið í veruleikanum eigur at vera á einum øðrum máli, enn tað er merkt at vera, kanst tú rætta hetta við at velja málið frá listanum, sum kemur fram, tá ið tú klikkir á teigin. Áðrenn málið verður broytt, verður orðið kannað við rættstavaranum hjá tí valda málinum. Um tað er í lagi, verður hildið fram við rættlestrinum. Er orðið ikki í lagi, verða nøkur uppskot víst í Forslag. Síðan kanst tú velja Ignorer, Erstat o.s.fr.

Ignorer her verður valt, um tú vilt hava, at rættstavarin skal leypa orðið um og lata tað standa óbroytt í hesum eina førinum.

Ignorer alle verður valt, um tú vilt hava, at rættstavarin skal leypa hetta orðið um so leingi sum Word koyrir.

Føj til ordbog verður valt, um orðið er eitt rætt stavað orð, ið skal leggjast aftur at brúkaraorðabókini.

Erstat verður valt, um orðið, í hesum eina førinum, skal skiftast út við tað, sum stendur í Forslag, ella tað, tú hevur skrivað í Ikke i ordbog.

Erstat alle verður valt, um hetta orðið, í restini av tekstinum, skal skiftast út við tað sum stendur í Forslag, ella tað, tú hevur skrivað í Ikke i ordbog.

Autokorrektur leggur orðið og rættingina av orðinum inn í autokorrektur-listan, so at orðið í framtíðini verður rættað, so hvørt tú skrivar.

Indstillinger... opnar eitt vindeyga við stillingum fyri rættstavaran. Hesar eru lýstar undir Stillingar

Fortryd kann ógilda tær rættingar, sum tú hevur gjørt frá rættstavaranum.

Annuler steðgar rættlestrinum.

Rættlestur av gomlum skjølum

Tá ið eitt gamalt skjal verður tikið inn í Word, stendur málið vanliga at vera danskt ella enskt. Hetta kann broytast við at fara inn í Angiv sprog... og velja føroyskt sum standardmál.

Ein annar máti er at marka allan tekstin sum ein blokk við at trýsta á Ctrl+A og síðan seta málið til føroyskt við Angiv sprog...

Stillingar

Klikk á Office-knøttin í ovasta vinstra horni av Word-vindeyganum. Hetta vísir eina valmynd.

Vel Word-indstillinger... og síðan Korrektur.

Tá ið ein krossur stendur við Løbende stavekontrol, verður teksturin rættlisin, so hvørt tú skrivar. Ein reyð strika verður sett undir orð, sum eru skeivt stavað. Um tú klikkir á eitt skeivt stavað orð við høgra músaknappi fært tú ein lista við uppskotum um, hvussu orðið skal broytast. Við at klikkja á eitt uppskot við vinstra músaknappi kanst tú broyta orðið til hetta uppskotið.

Tá ið krossur er settur við Skjul stavefejl, men kun i dette dokument, verður eingin reyð strika sett undir skeivt stavað orð.

Word minnist til, hvørjir partar av einum skjali eru rættlisnir, so at tað sum einaferð er rættlisið ikki verður rættlisið umaftur. Við Kontroller dokumentet igen kanst tú fáa Word at lesa alt skjalið umaftur. Listin við teimum orðunum, sum tú hevur valt at leypa um við Ignorer alle, verður eisini nullstillaður.